Thaum ub tsis muaj ntuj, tsis muaj teb, tsis muaj hnub tsis muaj hli, ntuj yees ntuj li yi xws qhoo hmab, teb yees teb li yi xws qhoo hlua, ntuj kheej ntuj li lam xws lub xab, teb kheej teb lis lam xws lub ncuav, lub ntuj tsis to raj, lub teb tsis to nrog, noob neej raug tsis muaj, noob tsav raug tsis tau.
Yog Faj Foob li sawv los xab xeeb, Foob siv li sawv los xab xaws, Faj Foob xab xeeb tau niam puj saub cev los poob, Foob siv xab xaws tau saub yawm cev los txog. Ces puj saub thiab saub yawm li hais tias: zaum no wb yuav los tsim kom tau ib lub ntiaj teb kom zoo thiab muaj nuj nqis heev. Thaum nkawd hais li no tag, ces saub yawm thiaj hais tias: Puj Saub! Koj yog poj niam ces koj puab luv ntiaj teb, es kuv mus puab lub ntuj, yog thaum wb puab tau tiav lawm, wb mam nqa coj los sib dhos ua ib lub ntiaj teb. Thaum hais li no tag ces Puj Saub txawm mus puab lub ntiaj teb, hos Saub Yawm txawm mus puab lub ntuj, nkawd ob leeg mus puab tau cuaj xyoos thiaj puab tau lub ntiaj teb thiab lub ntuj tiav los txog, thaum no nkawd thiaj nqa coj los sib dhos kiag no ua ciav lub ntuj yau me ntsis lawm lub ntiaj teb loj dua lawm ces tsis haum. Thaum zoo li no, nkawd thiaj muab lub ntiaj teb rub kom yau zog los phim lub ntuj ces thiaj ua rau lub ntiaj teb txoom rees ua roob, ua hav, tsis tiaj, tsis tus lawm. Ces niaj hnub no lub ntiaj teb thiaj ua roob, ua hav daws tsis xwm yeem lawm.
Thaum nkawd tsim tau lub ntuj, lub teb los lawm Puj Saub yug tau 6 leej tub:
- Yawg Theeb Tswv.
- Yawg Xob Laug.
- Yawg Ntxwg Nyug.
- Yawg Txoov Siv Yis.
- Yawg Zaj Laug.
- Yawg Ci kaws.
Ces Puj Saub thiab Saub Yawm thiaj faib teb chaws rau nkawd 6 leej tub mus nyob: Yawg Theeb Tswv ua tus thawj coj thiab tuav lub ntuj, lub teb tag nrho suav daws tib si. Yawg Xob Laug ua tus mus kav huab, kav cua thiab tsim noob xob. Yawg Ntxwg Nyug ua tus mus tsim noob dab kav dab thiab neej. Yawg Txoov Siv Yis ua tus mus tsim hauv kuab muaj tsuas, tsim noob neeb kho mob nkeeg. Yawg Zaj Laug ua tus mus tsim noob zaj thiab kav ciam dej, ciam av. Yawg Ci Kaws ua tus mus tsim hnub, tsim hli, tsim hnub qub thiab saib xyuas noob neej nyob hauv lub ntiaj teb nrog tsiaj txhu, xyoob, ntoo, nroj tsuag.. Thaum faib teb chaws rau cov tub tag li no lawm ces Puj Saub thiab Saub Yawm thiaj hais tias: me tub Ci Kaws tam sim no lub ntiaj teb tsis pom kev kiag koj kav tsij mus tsim hnub, tsim hli los kav lub ntiaj teb kom pom kev zoo. Ci Kaws teb: Aws! Thaum ntawd yawg Ci Kaws thiaj rua hlo qhov ncauj rov nee ntuj tshuab cuaj pas tawm plaws cuaj lub npuas dawb mus ua cuaj lub hli, tshuab cuaj pas tawm plaws cuaj lub npuas liab mus ua hnub. Cov npuas me mus ua hnub qub. Ces lub ntiaj teb thiaj pom kev kaj nrig lawm.
Thaum lub ntiaj teb pom kev zoo lawm, Puj Saub thiab Yawm Saub nkawd thiaj muab av los puab ua me tsiaj, me txhuv, me kab, me ntsaum, puab tas ib puas tsav yam tsiaj nyob lub ntiaj teb tib si. Nkawd mam thov cua tuaj rau siav, rau pa rau cua tib ntsawg tuaj dhau plaws xwb ces cov tsiaj ciaj sia tag ces Yawm Saub thiaj tsuab kiag ib teg av hua hawv rau lub ntiaj teb ces cia li muaj xyoob, ntoo, nroj tsuag tas puas tsav, puas yam nroj tsuag tib si lawm. Thaum no Yawm Saub thiaj hais tias Puj Saub! Wb yuav nee mus nyob cuaj tshooj ntug, ntshai tsam tsis muaj leej twg saib xyuas wb tej tsiaj, txhuv, xyoob, ntoo, nroj tsuag nyob hauv lub vaj no, wb yuav tsim kom tau ib tug zoo li koj thiab ib tug zoo li kuv los zov wb lub vaj tso wb mam li mus. Ces Yawm Saub thiaj muab kiag ib thooj av nyob hauv lub plawv roob coj los puab kiag zoo nkaus li Yawm Saub ntag, Yawm Saub thiaj thov cua tuaj rau siav, rau pa rau ces cua thiaj tib ntsawg tuaj dhau plaws xwb ces cia li ciaj kiag hos txawj hais lus meej nrias lawm.. Yawg Saub thiaj rov muab kiag ib thooj av los puab tsawg tsuag tau ib tug zoo Nkaus li puj saub ntag, Yawm Saub thiaj thov cua tuaj rau siav, rau pa rau, tab sis cua tuaj rau li cas los tsis ciaj li, Yawm Saub thiaj ntsia ntawm tus txiv neej lub hauv siab no ua ciav muaj qhov ua pa saws soom, hmlos hmlawv hmleev Yawm Saub thiaj muab riam tho kiag mus hlais tus txiv ib qho siab coj los ntsaws kiag rau tus poj niam ces cia li ciaj sia kais hais lus meej nrias lawm ces Yawm Saub thiaj muab nkawd tis npe hu ua: Niam Nkauj lab thiab Txiv Nraug Zoo ( OO ) no ces Yawm Saub thiaj hais rau nkawd tias: Nkauj lab thiab Nraug Zoo neb nyob zov lub vaj no mog wb yuav nee mus nyob lawm cuaj tshooj ntug saum ub, yog muaj dab tsi nyuab no neb mam hu wb xwb.
Thaum no ces Yawm Saub thiab Puj Saub nkawd nee mus nyob cuaj tshooj ntug. ( Hais txog ntu no mas, tos hais tias txiv neej ho nyiam poj niam thiab hlub poj niam, los sis txiv neej chim chim lawm poj niam hais ib nyuag lo lus zoo xwb mas txiv neej twb zoo zoo siab lawm yog vim txiv neej nplooj siab nyob ntawm poj niam lawm. Thiab tib neeg, tsiaj txhu, xyoob ntoo, nroj tsuag kab, ntsaum tau tuag mas yeej rov mus ua av xwb, vim yog av puab tawm los xwb, yeej mus tsis taus qhov twg li ). Thaum no Nkauj lab thiab Nraug Zoo nyob tau peb xyoos, Nkauj lab yug tau ob leeg tub muab tus hlob hu ua Tub Ci Tsuj, muab tus yau hu ua Tub Ci Npuag nkawd hlob tiav hluas ces tshav ntuj kub kub li nyob tsis taus ces nkawd hais tias: Vim cov hnub, hli no ntau lub dhau thiaj kub thiab ziab ntiaj teb qhuav tag, nkawv thiaj txua hneev thiab ntaus xub tooj, xub hlau. Nkawv mus zov tua yim hneev poob yim lub hnub, tua yim hneev poob yim lub hli, tshuav ib lub hnub, ib lub hli xwb ces hnub ntshai hnub tsis kam tawm tuaj lawm, hos hli ces hli tsis ntshai hli pheej nyiag tuaj xauj. Ib hnub hli tuaj xauj me ntsis hli nkaum rov qab lawm, hli maj mam tawm tuaj xauj txog 15 hnub hli ho maj mam nkaum zuj zus rov qab lawm. (Yog li thiaj muaj hli xiab, hli nqig). Thaum zoo li no ces lub ntiaj teb nyob tsaus ntuj nti xwb tsis pom kev lawm ces yawg Ci Tsuj thiab Ci Npuag nkawv thiaj kawg tswv yim tsis pom qab ua zaj twg li, nkawv thiaj hu tag nrho cov tsiaj tuaj nug tias: Nej leej twg nrog hnub thiab hli tham tau? Yog leej twg nrog hnub thiab hli tham tau no nej mus hu kom hnub rov tuaj kav ntiaj teb no. Tsis muaj tus tsiaj twg yuav teb, qaib thiaj teb tias: Kuv mas yeej nrog hnub sib tham tau tab sis yog kuv mus hu tau hnub tuaj mas neb txhob tua hnub ntxiv lawm no kuv thiaj hu ces Ci Tsuj thiab Ci Npuag nkawv teb tias wb tsis tua lawm, nkawv thiaj muab tau ib lub zuag kub rau qaib ntoo ces qaib thiaj ntxuaj tis kha qua peb suab xwb ces hnub thiaj rov qab tawm tuaj ces lub ntiaj teb thiaj li pom kev kaj lug li qub. Thaum lub ntiaj teb pom kev lawm tab sis nyob hauv lub ntiaj teb tsis muaj noob neej li tsuas muaj tsiaj txhu xwb ces Ci Tsuj thiab Ci Npuag nkawv thiaj mus nug niam Nkauj lab thiab txiv Nraug Zoo nkawv tias: Niam thiab txiv wb xav tsim noob neej los tsuj ntug, tsim noob tsav los tsuj teb no, ua li lub ntiaj teb no puas dav li cas? Tsim neej puas txaus neej nyob, tsim dab puas txaus dab txoos? Nkauj lab thiab Nraug Zoo teb tias: Me tub wb paub tsis zoo koj xav paub tseeb no koj mus nug yawg Ci Kaws, vim lub ntuj yog Ci Kaws xub txawm lub teb yog Ci Kaws xub txoos, Ci Kaws thiaj paub meej. Ces Ci Tsuj thiab Ci Npuag nkawv thiaj mus nug Ci Kaws tias: Yawg Ci Kaws, wb xav kom koj mus ntsuam lub ntuj saib ntuj dav los ntuj nqaim, xav kom koj mus ntsuam lub ntuj saib lub ntuj dav los lub teb nqaim? Vim ntuj yog koj xub txoos, teb yog koj xub txawm. Wb yuav xav tsim noob neej los tsuj teb tsim noob tsav los tsuj ntug no yog lub ntuj dav mas wb yuav tsim nqaij toog txhav hlau hos lub ntuj nqaim mas wb yuav tsim nqaij ciab zib txhav phlaub mag. Ces Ci Kaws teb tias: Mus sis mus, neb rov mus xya hnub tso neb mam li rov tuaj ntsib kuv dua. Ci tsuj thiab Ci Npuag nkawv rov qab lawm Ci Kaws yws yws tias: Kuv yog yawg tseem muaj cai tuaj txib kuv mus ntsuam ntuj, ntsuam teb no. Ces Ci tsuj thiaj Ci Npuag nkawv mus puv xya hnub nkawv rov tuaj nug tias: Ua li koj mus ntsuam lub ntuj dav li cas? Ci Kaws teb tias: Ob tug! Lub ntiaj teb nqaim kawg kiag yog neb yuav tsim noob neej mas tsim nqaij ciab zib txhav phlaub mag xwb, yog tsim nqaij toog txhav hlau mas ntiaj teb tsis muaj chaw nyob li lub ntiaj teb twb tsis txaus kuv dhia ua si nqaim nqaim kawg. Ces tub Ci tsuj thiab Ci Npuag nkawv rov qab los txog torn ib tog kev nkawv los so saum ib lub pob zeb, nkawv pom ib niag dav dub ya ya los, nkawv txawm nug niag dav dub tias: Dav dub! Koj muaj tis ya koj mus pab ntsuam lub ntuj saib ntuj dav li cas? Wb yuav tsim noob neej los tsuj ntug, tsim noob tsav los tsuj teb no. Yog ntuj dav mas yuav tsim nqaij toog txhav hlau, yog ntuj nqaim mas yuav tsim nqaij ciab zib txhav phlaub mag, ces niag dav dub teb tias: Aws! Neb mus xya hnub tso neb rov tuaj ntsib kuv ntawm no. Nkawv los tau xya hnub nkawv rov mus txog ntawm qhov qub chaw, niag dav dub ya ya rov los tsaws ntua ntawm pob zeb. Nkawv nug tias: Koj mus ntsuam lub ntuj dav li cas? Dav teb tias: Ntuj dav ntuj torn cas, teb deb teb torn ces. Neb tsim neej yeej txaus neej nyob, tsim dab yeej txaus dab txoos. Txhob poob siab li ntiaj teb dav kawg kiag.
Thaum Ci Tsuj thiab Ci Npuag nkawv hnov li no lawm ua rau nkawv chim siab heev kawg, nkawv thiaj mus muab Ci Kaws khi ntaus ces Ci Kaws thiaj cem nkawv tias: Ci Tsuj thiab Ci Npuag! Neb yuav xav sawv los kav lub ntiaj teb ua cas tus mus taus neb tsis tso mus, kuv no yog yawg kuv twb mus tsis taus neb tseem muab kuv ntaus thiab, neb siab tsis zoo yog neb hlub kuv mas neb noob neej tuag puv ib tsug 13 hnub kuv tsa ces sawv rov qab los xwb, tab sis neb siab tsis zoo ces neb noob neej mas tuag yeej tsis sawv li vim neb siab tsis zoo. Ces Ci Kaws cia li ntxeev tiaj hlo tuag kiag lawm xwb. Thaum no yawg Ci Kaws tus ntsuj plig nee mus txog saum Yawm Saub, Yawm Saub nug tias: Me tub koj los ua dab tsi? Ci Kaws teb tias: Txiv! Twb yog Ci Tsuj thiab Ci Npuag nkawv muab kuv ntaus es kuv thiaj los. Saib neb yuav kom kuv mus nyob qhov twg? Yawm Saub thiaj hais tias: Me tub yog li mas qhov twg lawv cov hlob twb nyob tag lawm, tshuav torn hnub thiab hli xwb koj mus nyob torn hnub thiab hli es txog ib xyoos 12 hlis twg mas koj nco ntsoov qhib rooj ntug tawm mus ntsuam xyuas lub ntiaj teb thiab nco ntsoov hwj xwm lub hnub kom txhob kub heev tsam noob neej tiv tsis taus ces Ci Kaws teb tias: Aws! Tab sis ib hnub torn ntej no kuv yuav tso lub hnub hlawv lub ntiaj teb kom kub nyhiab tas vim nkawv siab phem dhau. Yawm Saub teb tias: Koj txhob maj thaum twg kuv kom hlawv koj mam li hlawv, yog tsis hnov kuv hais no koj txhob lam hlawv mog. Ci kaws tias ua li los tau ces Ci Kaws thiaj mus nyob torn hnub thiab hli lawm.
