Thaum no Ci Tsuj thiab Ci Npuag nkawd thiaj mus nug -.yawm saub tias: me txiv wb yuav tsim noob neej los tsuj ntug, tsim noob tsav los tsuj teb no ua li wb yuav muab dab tsi coj los tsim? Yawm Saub teb tias: neb muab yam twg los nyuaj, neb mus muab nplooj xyoob, nplooj ntoos coj los tsim thiaj yooj yim, vim cov nplooj no twb muaj sia lawm ces nkawd rov los txog hauv ntiaj teb no.
Hnub xiab ib nkawd mus xuas sab tes xis zaws ib hnub pov rau nram tiaj tsaus ntuj rov los pw tag kis kaj ntug, ntsia nram tiaj pom neeg coob coob puv nkaus tiaj mus xyuas yog tib pab poj niam xwb. Hnub xiab ob nkawd rov mus xuas sab tes laug zaws ib hnub pov rau nram tiaj, tsaus ntuj nkawd los pw ib hmos kaj ntug tawm ntsia nram tiaj pom ib pab neeg coob coob kawg, mus xyuas yog ib pab txiv neej xwb ces nkawd thiaj muab lawv txis ua niam, txiv.. thaum Ci Tsuj thiab Ci Npuag nkawd noob neej nyob huaj vam puv lub ntiaj teb no lawm, tab sis ib xyoos 12 hlis twg mas nkawd noob neej tuag sis laub, sis lug ua rau noob neej ntshai kawg hos Ci Tsuj thiab Ci Npuag nkawd kuj poob siab heev, nkawd thiaj mus nug Yawm Saub tias: me txiv vim li cas wb noob neej mas txog lub 12 hlis thaum twg mas wb noob neej yuav tuag sis laub sis lug li Yawm Saub teb tias: Qhov kod mas yog vim neb muab Ci Kaws cov hnub thiab hli tua poob lawm yim lub hnub, yim lub hli mas cov roj ntshav hnub, hli poob los rau lub ntiaj teb lawm ces tsis tas li neb ho muab Ci Kaws ntaus tuag ces Ci Kaws mus nyob torn lub hnub thiab lub hli lawm mas puv ib xyoos 12 hlis Ci Kaws I sawv los ntsuam ntuj nws pom cov roj ntshav hnub, hli nyob ntiaj teb ces ua rau nws chim rau neb heev, nws thiaj ua kom neb noob neej tuag saib puas mob neb siab xwb. Kuv qhia neb mus ua li no ces zoo neb mus txog lub 12 hlis hnub 30 neb kom noob neej mus hlais nplooj nqeeb, nplooj tauj, ntaub liab thiab ib tug ntoo pos coj los sib khi ua ke neb tos thaum lub hnub yuav luag poob neb sau tsoom neeg los ua ib pawg muab ib tug qaib coj los lwm suav daws ces thaum ntawd Ci Kaws sawv ntsuam ntuj Ci Kaws pom noob neej ua li no ces Ci Kaws paub tias yog noob neej thov lub txim lawm no ces Ci Kaws thiaj tsis tso vij sub, vij sw los aiv ces noob neej thiaj noj qab nyob zoo. Thaum Ci Tsuj thiab Ci Npaug hnov Yawm Saub hais li no ces nkawd thiaj rov qab los qhia kom noob neej ua li ntawd ces noob neej paub tias ua li ntawd mas thiaj noj qab nyob zoo, ces noob neej thiaj pib ua li hais no txhua txhua xyoo. Thiaj hais tias ua 30 no (Qhov no qhia tau tias yog tsis ua lub 12 hlis hnub 30 mas txawm ua los yeej tsis zoo dab tsi li vim Ci Kaws tsis pom). Thaum tau li no lawm ces noob neej nyob huaj vam mus puv qab ntuj tab sis noob neej tsis mloog lus kiag, noob neej ua kev txag, kev txhaum puas tsav, puas yam tsis zoo: sib ntaus, sib tua, ua tub sab, tub nyiag, txiv neej mus deev luag poj niam, poj niam mus deev hluas nraug hais tsis mloog.
Thaum zoo li no lawm noob neej nyob ntiaj teb tau quaj ntsuag rau txhia txoj kev hu ntuj qaws xwb. Ces Yawm Saub thiaj hais tias: yog li no cia kuv sim hu kuv 12 tug tsiaj nyob ntiaj teb tuaj nug saib puas muaj li cua hais tiag. Ces Yawm Saub thiaj hu 12 tug tsiaj xws li tus:
- Yog Nas.
- Yog Nyuj.
- Yog Tsov.
- Yog Luav.
- Yog Zaj.
- Yog Nab.
- Yog Nees.
- Yog Yaj.
- Yog Liab.
- Yog Qaib.
- Yog Dev.
- Yog Npua.
Thaum Yawm Saub hu tau cov tsiaj tuaj txog tas Yawm Saub nug tus tsiaj twg los tus tsiaj ntawd yeej teb tias: Txiv! Noob neej mas siab tsis zoo kiag yeej muaj li Cua hais tiag tiag. Ces Yawm Saub thiaj rov qab hu nws 12 tug tub txib tuaj ntsib nws zoo li no:
- Yawg Theeb Tswv.
- Yawg Xob Laug.
- Yawg Ntxwg Nyug.
- Yawg Txoov Siv Yis.
- Yawg Zaj Laug.
- Yawg Ci Kaws.
- Nkauj Hnub.
- Nraug Hli.
- Nkauj lab.
- Nraug Zoo.
- Ci Tsuj.
- Ci Npuag.
Thaum cov tub txib tuaj txhij tas Yawm Saub thiaj hais tias: Kuv hu nej tuaj no mas yog vim noob neej nyob lub ntiaj teb tsis mloog lus ua kev txag, kev txhaum ntau tsav, ntau yam dhau mas kuv yuav tso dej nyab ntiaj teb kom noob neej tuag tas mam li rov tsim dua tshiab. Thaum no cov tub txib thiaj teb tias: me txiv ua li los yeej zoo thiab tab sis koj txhob maj cia peb mus xaiv kom tau ib tug txiv neej thiab ib tug poj niam uas yog noob neej tus siab ncaj, siab zoo tshaj plaws cia yeej noob tso mam li tso dej nyab. Yawm Saub teb tias: ua li los tau. Thaum no Txoov Siv Yis thiaj los hais rau Nkauj Mim thiab Nraug Nus uas yog ob tug tub, ntxhais ntsuag tias: Nkauj Mim thiab Nraug Nus! Yawm Saub yuav tso dej nyab lub ntiaj teb no neb txhob ua dab tsi lawm, neb kav tsij mus txua kom tau ib lub nkoj loj loj kawg es neb muab kom tas me noob qoob, noob tsa, noob tsiaj, noob txhuv, noob kab, noob ntshaum, noob nroj, noob tsuag, coj los ntim rau hauv lub nkoj tshuav xya xyoo xwb ces dej yuav nyab ntiaj teb. Thaum nkawd paub li no lawm ces nkawd niaj hnub mus txiav ntoo los txua nkoj. Tej neeg zej zog nug tias: Nkauj Mim thiab Nraug Nus neb pheej txua nkoj ua dab tsi? Twb yog dej yuav nyab lub ntiaj teb tsis ntev saum no es wb thiaj txua nkoj los npaj. Tsoom neeg cem zom zaws tias: Ob niag ntsuag tu qab, tu twv li ntawd es nim yuav paub txog dej nyab ntiaj teb no, niag vwm xwb. Thaum nkawd txua tau nkoj tiav ces nkawd muab puas tsav, puas yam noob tsiaj, noob txhuv, noob kab, noob ntsaum, nroj tsuag, xyoob ntoo ntim tag nrho rau hauv lub nkoj ces muaj ib hmos Txoov Siv Yis thiaj los hais tias: Nkauj Mim thiab Nraug Nus neb kav tsij tawm mus nee nkoj tarn sim no dej twb nyab tuaj lawm, ces nkawd cia li khiav khiav mus nkag kiag rau hauv lub nkoj, ces dej puv - kiag ntiaj teb tarn sim ntawd ntag (qhov uas dej nyab no mas tsis yog dej puv tuaj. Yog Yawm Saub muab lub ntiaj teb no raus dej xwb, vim tias thooj av no muaj plaub (4) ntswg cua tuav xwb).
Dej nyab tau 120 hnub noob neej, noob tsav nyob ntiaj teb tuag tu noob nrho. Dej thiaj li nqig zuj zus tas, lub nkoj mam li poob rov los txawb twj ywm saum npoo av, (Qhov uas dej nqig no mas yog Yawm Saub muab ib ntswg cua los txuas rau lub ntiaj teb kom nyob tus yees xwb). Thaum dej nqig tas, nkawd los nyob tau 120 hnub saum npoo av ntxiv cov av mam li khov ruaj qoos, ces nkawd mam muab cov noob tsiaj, noob txhuv tso tawm, rau sab nraud, hos tej noob qoob, noob tsa nkawd mam muab tseb rau nram tiaj ces me nroj tsuag mam xeeb hlav tuaj, me Kab, me Ntsaum, me Noog, me Nas mam huaj vam tuaj puv toj, puv pes. 10/- Thaum dej nqhuab tag li no lawm ces Nkauj Mim thiab Nraug Nus nkawd nyob tau 12 xyoos tsis pom ib tug neeg li ces thaum no Nraug Nus thiaj hais tias: Nkauj Mim koj ntim su es koj mus lawm hnub tuaj, kuv ntim su es kuv mus lawm hnub poob, wb mus nrhiav saib puas muaj neeg nyob qhov twg, wb mus mas hais li no tseg yog koj mus nrhiav tau neeg no 3 xyoo koj los nyob qhov no tos kuv, yog kuv mus nrhiav tau neeg no kuv los nyob qhov no tos koj es muaj dab tsi los wb nyias mam mus nyias.. Thaum hais li no tas lawm ces nkawd nyias mus nyias Nkauj Mim mus tau peb xyoos, Nraug Nus mus tau peb xyoos nkawd rov los txog, Nraug Nus nug tias: koj puas ntsib neeg? Nkauj Mim teb tias: kuv tsis pom ib tug neeg li Nkauj Mim ho nug Nraug Nus tias: koj ne! Puas ntsib? Nraug Nus teb tias: kuv los ib yam nkaus. Ces nkawd rov qab los nyob tau 12 xyoo ntxiv Nraug Nus thiaj hais tias: Nkauj Mim wb rov qab mus nug saub saib wb yuav mus nrhiav neeg lawm qhov twg thiaj muaj neeg, Nkauj Mim teb tias: mus sis mus. Nkawd thiaj mus nug saub, saub thiaj hais tias: Nkauj Mim thiab Nraug Nus noob neej tuag tu noob lawm neb rov mus tsev, neb mus muab lub niag zeb tshem tawm es Nkauj Mim muab txhib niam nog ev, hos Nraug Nus muab txhib txiv nog ev, neb nee lub niag roob siab siab, thaum neb nee nto saum ncov roob lawm Nkauj Mim muab txhib zeb dov lawm sab xis hnub poob, hos Nraug Nus muab dov lawm sab laug hnub tuaj es neb nyias lawv nyias txhib zeb qab yog txhib zeb mus khuam qhov twg ces mus nyob qhov ntawd. Ces nkawd thiaj li rov qab los txog tsev nkawd thiaj los muab ob txhib zeb li hais coj los nog ev nee lub roob siab siab, thaum nee nto roob lawm, nkawd thiaj nyias muab nyias sab li Yawm Saub qhia zeb ntog lawm nkawd thiaj lawv qab mus ua cas ob txhib zeb ntog ntog mus sib khwb kiag ua ke lawm ces Nraug Nus thiaj hais tias ab! Nkauj Mim yog li no ces wb kuj sib yuav xwb. Nkauj Mim teb tias: wb rov mus nug saub tso saib saub hais li cas? Ces nkawv thiaj rov mus nug saub, nkawv mus txog nkawd hais tias: Wb mus dov zeb li koj qhia tab sis ob txhib zeb pheej ntog mus ua ke lawm xwb, yog li wb sib yuav puas tau? Saub teb tias: Neb yog ob nus muag, neb sib yuav mas yuav ua ntau yam thiaj sib yuav tau. Kuv qhia neb paub tias thaum ub dej nyab ntiaj teb mas dej nyab noob neej ntawv tshoob, ntawv kos mus dua zaj laug teb lawm, yog neb sib yuav ua niam txiv mas neb yuav mus muab txiaj tshoob ntawv kos hauv zaj laug los txog mas thiaj sib yuav tau.
Ces nkawd rov los txog tsev, nkawd los sab laj saib yuav kom leej twg mus muab, ces nkauj Mim thiaj hais tias: Wb twb pab tau cov tsiaj kom dej txhob nyab lawv, mas wb sim nug saib tus tsiaj twg thiaj mus tau hauv dej, wb mam kom tus tsiaj ntawv mus pab muab los xwb ces nkawd thiaj ib suab hu cov tsiaj los tag huv si, nkawd thiaj hais tias: Nej leej twg puas mus taus hauv dej? Yog tus twg mus taus no thov pab mus muab ntawv tshoob, ntawv kos hauv zaj laug teb los rau wb. Ces os thiaj teb tias: Kuv mus taus xwb, yog li koj mus nqa los. Thaum no qaib txawm teb ntua tias: Kuv nrog os mus thiab ces qaib thiab os nkawv mus txog ntawm ntug pas dej qaib hais tias: Os! Kuv mus tsis taus hauv dej, koj mus xwb, kuv nyob ntawm no tos koj. Ces os thiaj li plos ntxhias dua puag zaj laug teb lawm. Os mus ntsib zaj laug ntxhais ntxawm, Os hais tias: Kuv yuav tuaj xyuas saib noob neej txiaj tshoob ntawv kos puas nyob zaj laug teb no! Yog muaj no thov koj muab rau kuv nqa mus rau Nkauj Mim, Nraug Nus nkawd tau tsim noob neej no. Zaj laug ntxhais ntxawm teb tias: Muaj kawg! Cia kuv mam muab rau koj, zaj laug ntxhais ntxawm muab kiag phau ntawv tshoob cev rau Os. Thaum no os nqa los txog saum yaj ceeb, ces Qaib pom, Qaib txawm hais tias: Os! Koj sab sab lawm ces muab phau ntawv rau kuv nqa ces Qaib nqa phau ntawv. Nkawd los txog ib tog kev muaj ib lub pas dej, Os hais tias: Qaib! Sov sov kuv li koj nyob nov tos kuv, kuv mus da dej me ntsis tso wb mam mus, os mus da dej lawm, qaib nyob, qaib pheej muab phau tshoob noj xuas ko taw raub, xuas kaus ncauj ncaws noj, ncaws noj ib chim Os los txog ces qaib twb muab phau ntawv ncaws noj tag lawm, ces Os thiaj hais tias: Aub! Ua cas koj muab phau ntawv tshoob noj tag lawm! Yuav ua li cas? Qaib teb tias: Xyov li laud ces nkawd los txog tsev, Os mus hais tias: Niam thiab txiv! Kuv twb mus nqa tau phau ntawv tshoob, ntawv kos hauv zaj laug teb los lawm tab sis wb los txog torn kev sov sov kuv es kuv mus da dej kom Qaib saib no Qaib tsis tsim txiaj qaib muab ncaws noj tag lawm. Thaum no Qaib teb tias: Kuv noj lawm tiag tab sis tseem tshuav ib qho, ib me ntsis mus khuam ntawm kuv tus nplaig thiab khuam ntawm kuv cov ntiv taw. Thaum no Nkauj Mim, Nraug Nus tsis paub yuav hais li cas, nkawd thiaj rov qab mus nug saub dua. Saub thiaj hais tias: Yog muaj li tiag no ces neb mus muab Qaib tua es saib hauv qaib tus nplaig thiab saib nram Qaib ko taw ces pom xwb. (Yog li thiaj saib taw qaib) ces Nkauj Mim, Nraug Nus thiaj rov los muab qaib tua saib taw.
