Thaum tau li no lawm nkawd rov mus nug saub tias: zaum no sib yuav tau lawm los tsis tau? Saub teb tias: tsis tau tau nawb, neb yuav mus kawm tus cai tshoob, zaj tshoob, qeej tshoob, kwv txhiaj tshoob hauv zaj laug teb kom tau mas thiaj sib yuav tau, ces Nraug Nus thiaj nug tias: yuav ua li cas kuv thiaj mus ntsib tau zaj laug? Saub teb tias: tsis nyuaj li koj mus txog torn lub pas dej loj, ces koj tsa ncauj hu tias: yawg zaj laug tus dawb txoob tus dawb kaus! Niam no ntiaj teb tsis muaj noob neej lawm, tshuav Nkauj Mim thiab Nraug Nus wb yuav sib yuavh ua txij, ua nkawm no es wb thov koj tuaj pab qhia kev tshoob kos rau wb tau coj mus tsim noob neej nyob ntiaj teb no. Neb hais li no xwb ces zaj laug yeej tuaj xwb. Ces nkawd thiaj rov qab los mus tsa ncauj hu li saub hais Nraug Nus mus txog torn pas dej, nws tsa ncauj hu peb suab xwb zaj laug tawm plaws tuaj. Zaj laug hais tias: neb hu kuv tuaj muaj plaub, muaj ntug dab tsi? Nraug Nus teb tias: yog wb yuav sib yuav ua txij nkawm los tsim noob neej no es yawm saub yuav kom wb tuaj nug koj es thov koj qhia kev cai tshoob kos, zaj tshoob, qeej tshoob, kwv txhiaj tshoob rau wb coj mus siv tsim noob neej nyob ntiaj teb. Ces zaj laug teb tias: yog li ntawd no neb rov mus peb hnub tso neb mam li rov tuaj ntsib kuv dua. Ces nkawd rov qab los nyob tau peb hnub, nkawd mam mus txog torn ntug pas dej ces zaj laug hais tias: neb tuaj txog lawm los tsev, Zaj laug muab nkawd qaim kiag hauv qhov tsos ces nqis kiag dua hauv pas dej lawm, nkawd mus txog hauv zaj laug tsev Nraug Nus mus kawm zaj tshoob, qeej tshoob, kev cai tshoob kos, hos Nkauj Mim mus kawm kwv txhiaj tshoob, kawm kev cai ua nyab. Thaum nkawd kawm tau tiav tas, nkawd yuav rov qab los tsev, zaj laug ntxhais ntxawm nyiam nyiam Nraug Nus, nws qhia Nraug Nus tias: Nraug Nus! Kuv yuav pab kom neb noob neej nyob huaj vam puv ntiaj teb, yog koj kam no kuv yuav nrog koj mus thiab tab sis kuv yuav muab ib lub kaus khi ib txoj siv ceeb rau koj nqa mus tsev. Neb txhob nthuav lub kaus thiab txhob daws txoj siv ceeb, neb coj mus khuam cia peb hnub tso neb mam li daws txoj siv ceeb coj los rau Nkauj Mim ntoo, mam muab lub kaus nthuav. Kuv qhia koj paub tseeb tias: txoj siv ceeb ces yog kuv ntag, lub kaus ces yog koj, mas kuv yuav mus nrog neb nyob pab kom neb noob neej huaj vam, yog neb tsis mloog lus neb lam muab nthuav mas neb ua neej yuav tsis zoo, tsis vam meej vim kuv pov hwm tsis tau neb lawm (poj niam Hmoob ntoo siv ceeb mas yog ntoo zaj laug ntxhais nkauj ntxawm tus ntsuj plig) thaum hais li no tas ces nkawd thiaj rov los tsev.
Nkawd los txog tsev nkawd thiaj mus nug saub tias: wb mus kawm kev cai tshoob kos tiav tas lawm, wb sib yuav tau los sis tseem tshuav dab tsi ntxiv thiab? Saub teb tias: neb sib yuav tau. Ces nkawd thiaj sib yuav txij hnub ntawd los. Nkawd sib yuav tau ob xyoos, Nkauj Mim yug tau ib tug me nyuam tsis muaj tes, tsis muaj taw tib tug kheej loos toos xwb, ces nkawd xav xav nkawd thiaj rov mus nug saub dua, nkawd mus piav rau saub mloog tas saub thiaj teb tias: zaum no neb noob neej yuav huaj vam puv ntiaj teb sai xwb, kuv qhia li no neb rov mus muab hlais ib daig pov rau hnub tuaj, ib daig pov rau hnub poob, ib daig pov rau qab ntuj, ib daig pov rau hauv ntuj, ib daig pov nraum toj, ib daig pov nraum pes, ib daig pov lawm laj fab, ib daig pov lawm toob fab. Tshuav cov seem ces neb mam muab hlais pov rau ntsis tauj, ntsis tsuag xwb ces nkawd thiaj rov los txog tsev, nkawd thiaj los muab hlais pov txhua txhua li yawm saub qhia. Tshuav cov seem nkawd thiaj hlais daig pov rau ntsis tauj, daig pov rau ntsis tsuag, daig pov rau ntsis ntsaj, daig pov rau ntsis hmab. Nkawd hlais pov tag ces nkawd pw ib hmo tag kis kaj ntug plaws, nkawd tawm nraum zoov ntsia nram tiaj pom neeg ua me nyuam tsev pheeb suab pawg lug hos rauv taws ncho pa dawb vog txhia chaw, nkawd thiaj mus xyuas, thaum nkawd mus txog lub tsev twg muaj ob niam txiv nyob ua ke, luag hu nkawd tias: neb tuaj los niam thiab txiv! Nkawd nug tias; neb yog Hmoob dab tsi? Lawv teb tias: wb yog Hmoob Lis; nug tus tod los teb tias wb yog Hmoob Vaj ces nkawd nug cov nyob ze puav leej muaj xeem tag nrho hos cov uas nkawv muab pov mus deb lawm ces thiaj tsis muaj xeem. Ces Nkauj Mim thiab Nraug Nus nkawd rov mus qhia yawm saub tias: Txiv! Wb mus ua li koj qhia, tarn sim no wb noob neej mas coob kawg lawm ua li wb yuav ua dab tsi ntxiv? Yawm saub teb tias: neb mus muab lawv txis ua niam txiv xwb, tab sis muaj ib los lus txwv tsis pub yus xeem yuav yus xeem, yus xeem mus yuav luag xeem xwb mas ua neej thiaj zoo. Yog yus xeem rov yuav yus xeem mas ua neej tsis pluv huv, tsis zoo yog ua neej muaj mas txoj sia tsis ntev, yog txoj sia ntev mas txom nyem, li no tsis tas, yog noob neej sib yuav mas yuav tsum ua tshoob, ua kos raws txoj cai mas thiaj sib yuav tau. Vim noob neej yog neeg tsis yog tsiaj. Ces Nkauj Mim thiab Nraug Nus nkawv los muab lawv txis ua niam txiv thiab qhia txoj kev sib yuav rau noob neej raws li yawm saub qhia.
Thaum tau li no lawm ces noob neej nyob huaj vam puv ntiaj teb, noob neej tsis txawj tuag, nyob zoo mus tas li ces muaj ib niag ntxhais mus yuav ib niag tsov ua txiv, ces nyob nyob niag tsov tuag ces niag ntxhais nco nco niag tsov, nws quaj quaj ces cov neej tsa thiaj hais tias: yog nws nco hwv no ces peb muab niag tsov coj los pam ua qeej, ua nruas. Thaum hais li no tas ces lawv thiaj muab niag tsov coj los pam tau cuaj hnub, cuaj hmos tshuab qeej ntaus nruas nrov nroo ntws ces cov suab quaj, suab nyiav, suab qeej, suab nruas nrov mus taug taug yawm ntxwg nyug pob ntseg ces ntxwg nyug thiaj yws yws tias: yog muaj tus dab tsi tiag es yuav phov tas li sim tso nquab mus xyuas saib yog dab tsi tiag. Ces nquab tuaj ya ya tsis pom dab tsi, nquab rov mus hais tias: tsis pom dab tsi, tsuas hnov suab quaj, suav nyiav ntsuag qees hauv tsev xwb. Ntxwg nyug thiaj tso mos ntsuab tuaj xyuas, mos ntsuab ya ya tuaj txog mos ntsuab maj mam nkag mus xyuas tas, mos ntsuab rov mus txog, mos ntsuab hais tias: yog niag tsov tuag xwb ces ntxwg nyug thiaj cem tias: yog noob neej ntshaw ploj, noob tsav ntshaw tuag. Ces ntxwg nyug thiaj muab kiag noob mob, noob tuag, noob toj, noob taug ua sis los rau ntiaj teb ces ntiaj teb thiaj muaj mob, muaj tuag txij li ntawd los. Thaum no ces noob neej muaj ploj, muaj tuag, noob neej ho muab tsiaj, muab txhuv coj los tua pam tuag thiab, ces noob neej quaj cem quaj cem ntxwg nyug, tsiaj txhu los quaj cem ntxwg nyug ib yam. Ntxwg Nyug nkees mloog dhau, ntxwg nyug thiaj hais tias: yog nej cem kuv dhau ces cia kuv ho tuag tso nej ho tuaj quaj kuv. Ces ntxwg Nyug cia li ntxeevtiaj hlo tuag kiag lawm. Ces yuam kom neeg thiab tsiaj mus quaj nyiav ntxwg nyug, ces cov tsiaj mus tas huv si, tshuav cuam xwb, cuam hais tias nej kav tsij mus, tag kis sawv ntxov kuv mam nee pem roob siab nyiav xwb. Ces cov tsiaj mus ua ntej tas, neeg mam lawv qab xwb, neeg mus txog ib lub tsag zeb muaj ib niag vaub kib nee nee tsis nto lub tsag zeb, cov tsiaj mas muab niag vaub kib tsuj tsuj mluav tas, neeg thiaj muab niag vaub kib nqa rau saum npoo tsag; vaub kib thiaj hais tias: neeg! Kuv qhia koj paub tias: yawg ntxwg nyug tsis tuag; tas nrho cov tsiaj mas lawv nyiav hais tias: thaum ntxwg nyug nyob mas suav daws txom nyem, zaum no ntxwg nyug tuag tas mas suav daws yuav tau zoo, lawv nyiav li ntawd, hos koj mus nyiav mas koj nyiav tias: thaum ntxwg nyug nyob mas peb thiaj tau zoo, yog ntxwg nyug tuag tas lawm mas peb yuav txom nyem, nws nyob qhov twg kom sawv tsees los no. Koj nco ntsoov nyiav li no xwb. Ces neeg mus txog neeg thiaj nyiav li vaub kib hais.
